• Krea

Isla Nobo: Kòrsou 2069

E kuenta akí ta trata e blòkinan di konstrukshon fundamental di nos sosiedat: ambiente konstruí, energia, informashon & teknologia i transporte. Ku e kuenta akí nos ke reta bo pa partisipá aktivamente i kuminsá krea e Kòrsou di futuro, ku nos tur por ta orguyoso di dje. E meta di nos kuenta ta pa inisiá vários diskushon tokante nos futuro.


Nos kuenta ta duna un bista di nos vishon pa Kòrsou na aña 2069. Ku nos kuenta, nos ke mustra e reto- i opstakulonan ku nos mester tuma pa realisá e vishon akí. Den e panorama nos ta repartí e retonan bou di kuater kategoria:


  • Ambiente konstruí (Isla Urbano)

  • Energia (Isla Duradero)

  • Teknologia di informashon i komunikashon (Isla Konektá)

  • Transporte (Isla Móbil)


Nos ta presentabu nos vishon kontando e kuenta di Janchi na 2069.


Ei, kon ta?

Ami ta Janchi, arkitekto i diferente otro kos banda di esei, por ehèmpel Otrobandista, ya ku mi a nase i krese den e bario ei. Mi a lanta stimando mi bario i mi ta fasiná pa e ambiente einan. Den mi hubentut algun kas i kaya tabata dekaí, pero mi a sinti e potensial di mi bario sí, meskos ku esun di siudat i henter nos isla. Ku diploma di skol sekundario mi a bai afó pa studia, manera hopi studiante den e tempu ei. Ami a skohe pa studia Arkitektura i Desaroyo Urbano. Durante mi estudio mi a probechá di e chèns pa bishitá diferente pais i siudat floresiente pa haña inspirashon. T'e kalidat di bida i tur e inovashonnan ku mi a mira durante mi biahenan a inspirá mi. Esei a pone mi disidí pa bai Kòrsou bèk pa kontribuí na realisashon di e potenshal ku mi a premirá hopi aña pasá. Bo ta pèrmití mi dòsplak'i palabra, por fabor? Awèl, laga mi konta bo mi vishon.


Rayo di solo ta lanta mi for di mi kama. Esta un bunita bista mi tin riba brùg di Juliana. Luna pasá mi a muda bin biba den e apartamentu resientemente konstruí na Isla Nobo. Isla Nobo ta un bario den kurason di Willemstad, ku ántes tabata konosé pa su tera shushi i su airu kontaminá. E toren di apartamentu akí ta un di e último proyektonan realisá den un rekonstrukshon urbano mayó. Mas o ménos 50 aña pasá, niun hende no por a imaginá ku por a transformá e pida tera desolá i kontaminá akí den un siudat yamativo di alta kalidat.


Tabatin un kambio drástiko di mentalidat den e planifikashon urbano di Kòrsou pa remeditá kon por usa nos siudatnan. Kon pa kambia kas riba nan so rondoná pa kurá grandi yen di palu, den blòki di apartamentu di vários piso. Blòki di apartamentu no ta solamente e tipo di bibienda mas duradero, sino nan ta ofresé e posibilidat di krea ambiente vibrante i bibu tambe, ku un meskla di residensia, ofisina, lugá di kompra i parke pa keiru. Remodelashon di e plan urbanístiko a hunga un papel klave den kreashon di e posibilidat akí.

Bahando trapi pa yega e kafé abou, ya mi ta hole e fragansia familiar di arepa di pampuna ku kané. 'Bon dia, Janchi!' Sandra ta kumindá mi djingueri miéntras e ta trese mi un tayó ku arepa sukulento. E ta krese pampuna riba dak di e edifisio. Mas fresku e no por sirbi nan. Den pasado nos a konosé skarsedat di bèrdura i fruta, debí na problema kousá pa nos dependensia di kuminda importá. Un bon ehèmpel a pasa na 2018 ora Venezuela a sera frontera pa nos islanan ABC i nos a keda sin risibí e barkunan di fruta i bèrdura for di tera firme. Nos a realisá ku no por a keda dependé di e importashon ei mas. Algun kunukero a probechá di e demanda pa fruta i berdura i nan a subi nan produkshon di produkto lokal. Públiko tambe a bira mas konsiente di e manera duradero di produkshon. Den kombinashon ku desaroyo teknológiko, pokopoko mas kunuku urbano a nase. Awor nan ta produsí kasi 70% di e konsumo vegetal na Kòrsou.

Si mi bai awor, mi por kue ponchi eléktriko pa Skalo ku ta sali den 6 minüt. Hopi kos a kambia respekto di mobilidat na Kòrsou. Transporte públiko a mehorá drástikamente i a hasi poseshon di outo privá relativamente inatraktivo. Pa e motibu akí mi a bende mi outo un 45 aña pasá pa un karchi di mobilidat públiko mensualmente repartí, 'Bip Bip’, pa yega tur kaminda. Den e temporada ei Bip Bip tabata kosta 50 florin pa luna. Djadumingu mi gusta kue bùs eléktriko, sistema Tránsito Rápido (BTR) pa Mari Pampun Beach Boulevard i subi laman wensùrf. Na e bulevar vibrante mi ta topa otro fanátiko di deporte akuátiko. Bùs ta sali kada 10 minüt di Skalo i denter di un rat'i ora mi ta yega mi destino pasobra e infrastruktura ta permití pa yega sin mester para hopi.

Ta djamars dies or di mainta. Mi a kaba di yega Skalo, e bario empresarial di Willemstad. Kaya ta yená ku hende. E último añanan populashon di Kòrsou a krese supstansialmente, spesialmente den sentro di siudat. Kompará ku 2019, e kantidat di habitante a krese te 620.000 awe! E kresementu asombroso di nos poblashon akí a kuminsá ora hopi yu di Kòrsou a regresá, prinsipalmente for di Hulanda, i hopi hende di otro isla den region a imigrá. Ku invershon visibel den un ekonomia di konosementu den añanan 20, Kòrsou a sa di atraé talento tòp di tantu su yunan bibá afó komo personanan for di Karibe. E kresementu enorme akí a krea sosten pa e invershonnan nesesario pa alsa kalidat di infrastruktura, transporte, energia, teknologia digital i bibienda. Un populashon diverso no ta proba nos abilidat di atraé talento so, sino e ta stimulá inovashon i kresementu ekonómiko tambe. Nos tabata kapas di brasa e rikesa di nos diversidat. Éksito di esaki bo por mira den barionan manera Barrio Latino i China Town.

Mi ta kana den 10 minüt di e terminal di ponchi pa Fundashon Kas Popular (FKP). Gobièrnu ta stimulá kanamentu den siudat masha. Ku e kresementu resien di populashon, ku a resultá den área urbano mas denso, sentro di siudat a wòrdu reformá na diferente manera pa enkurashá kanamentu. Kas, kafé, tienda, pakus i ofisina ta situá serka di otro di moda ku ta fásil pa yega nan na pia. Kaya ku hopi palu kantu di kaminda ku ta ofresé sombra fresku. Pa promové kanamentu ainda mas, a prohibí outo for di siudat mas o ménos 40 aña pasá. E medidanan akí no a yuda establesé Willemstad komo un ehèmpel di siudat kaminabel so, sino nan a kontribuí na mehorá salubridat en general di e habitantenan tambe.

Na FKP mi ta bai topa Tania pa diskutí e fase final di desaroyo di e bario Bon Pais pegá ku Wechi. E meta di Bon Pais ta pa krea un ambiente di bibienda kontemporáneo ku konstrukshon di kas sosial pa studiante i resien graduá. Tania a puntra mi pa kompartí mi perisia di diseñá habitashon ku ta keda fresku henter dia sin dependé muchu di èrko. Di e manera ei e agensia di kas popular por redusí uso di energia den nan kasnan, ku lo resultá den faktura mas kómodo pa e habitantenan. Riba e nivel logístiko, Bon Pais ke bira mas duradero, usando mas tantu desperdisio resiklá posibel di Landfill Malpais ku a sera.

Na fin di nos reunion, mi ta bisa Tania ku mi ta bai topa Kalisa, mi kolega anterior, profesor di Cities of Tomorrow na Universidat di Teknologia na Jamaica. Mi ta kue bùs di Skalo pa Hato, Caribbean International Airport, pa yama Kalisa bon biní. Nos aeropuerto aktualmente ta funshoná komo e hùp di Karibe ku ta konektá pasahero i kargo di Norteamérika i Europa pa Suramérika i Karibe. Nos a bira un di e aeropuertonan mas kardinal di region, ku ta prosesá mas di 6 mion pasahero pa aña, ku ta residente plùs pasahero di tránsito.

Ami ku Kalisa ta presensiá un konferensha tokante Siudat Inteligente organisá pa University of Curaçao (UoC). E oradó prinsipal di e konferensha ta nos minister di Siensia i Teknologia. Su charla ta trata uso di outomatisashon pa yuda solushoná reto ku a surgi debí na e ekspanshon lihé di nos populashon. "Durante hopi aña kresementu di Kòrsou tabata un reto pa nos," e ta splika. "Pa sigui manehá nos siudatnan efisientemente, nos ke drenta e siguiente fase den outomatisashon pa mehorá nos ret di transporte, servisio públiko, suministrashon di kuminda, i nos seguridat i vigilansha."


Despues di e diskurso, nos ta diskutí tokante e ròl di teknologia den edukashon di nos yunan, for di grupo 1, i kon por prepará e chikitinnan pa un bida yen di reto teknológiko. Un señora a kompartí ku su ñetunan for di edat di 9 aña ya tabata siña programá kòmpiuter. Pasobra teknologia ta parti di bida diario di mucha, ta importante pa bira konsiente di e konsekuenshanan sosial. Kalisa ta bisa ku na Jamaica universidat ta investigá mucha ku ta konektá emoshonalmente ku entidatnan digital. Kisas esaki ta un tema ku e dos universidatnan por investigá konhuntamente den un siguiente konferensha.

Despues di e konferensha nos a tuma despedida. Na kaminda pa e bòrchi di bùs, mi ta para un ratu pa tira un bista riba e paisahe energétiko di parke universitario. Studiante ta kore bai lès, òf ta studia purba un ke otro prototipo òf ta preparando pa un wega di bala. Ora mi tabata lektor invitá pa e kurso di Desaroyo Urbano Sano i Duradero, mi a bishitá universidat frekuentemente. Den e kurso ei, hopi biaha mi a diskutí e lèsnan saká for di e desaroyo di bario di Wechi komo un gran ehèmpel di desaroyo urbano sano i duradero.

Mi bista ta fiha riba un grupo di studiante trahando duru pa 'Gran Reto di Energia' un proyekto anual masha gabá, organisá pa universidat pa stimulá solushonnan energétiko inovador. Un pankarta kologá pafó ta anunsiá tema di e aña akí: Sistema di Depositá Energia. E tópiko akí ta reta studiante pa eksplorá posibilidat di krea un sistema di energia kompletamente desentralisá pa Kòrsou. Ku tal sistema bo por konektá tur bario apart via microgrids ku otro, ku ta hasi teknologia na eskala chikí pa energia renovabel mas efisiente i ménos kostoso. E tipo di teknologia akí lo tabata bentahoso durante desaroyo di Wechi na 2024.

Mi a yega parada di bùs na universidat pa mi bai Willemstad bèk. Mi ke kaba e dia akí tirando un kabes na Marichi, e playa públiko den siudat. Kanando pa e pir, mi no por laga di kumpra un snèk na un di e tantísimo tiendanan pop-up den kònteiner resiklá kolorido ku ta sirbi pasapalu sukulento i kuminda krioyo kreativo dushi - bon uso di un área ku tabata malusá solamente komo lugá di parker asfaltá.

Despues di un bon landá, mi ta seka mi kurpa, limpia santu for di mi pia, bisti un flanèl i kana bai áwasa na Otrobanda pa topa amigu ku famia pa sena. Solo ta baha. Un grupo di hóben na Brionplein ta toka i kanta e kantika klásiko 'Atardi'. Mi ta sinta opservá hende pasa. Turista ta pura bolbe krusero, mucha ta hunga riba kaya, ofisinista ta topa otro pa happy hour. Mi ta kinipí mi brasa. Kaya di Otrobanda, siudat i henter Kòrsou a para bira e ambiente floresiente i bibu ku mi a soña di dje dia mi tabatin 12 aña. Algu ta interumpí mi reflekshon: gritu di mi bon amigu Yubi: "Pabien, Janchi, wèl, 74 aña! Awor sí nos ta kuminsá bira grandi, hòm."


Diskutí awe pa aktua mayan

Nos a mira kon aki 50 aña nos dia por pasa. Kisas esaki ta mustra eksaherá. Pa nos vishon, nos a studia i usa teknologia i ideanan ku ta madurá na e momentu akí òf ku ta haña grep rápidamente rònt mundu. Na 2069 nos ta spera ku esakinan ta normal. Nos ta mira e potensial ku Kòrsou tin pa kuminsá prepará e fundeshi pa adoptá teknologia ku ta mehorá nos siudat- i bidanan. Pa ora ku e siguiente generashon di sientífiko- i ingenieronan surgi, nos lo ta kapas di realisá futuro di nos soñonan.


Kon abo ta mira Kòrsou di futuro? Diskutí awe pa aktua sabí mayan!


Download e kuenta aki.



0 comments

Recent Posts

See All